SMZ IPO TAYARI KUSHIRIKIANA NA WANAHABARI KUTOKA OMAN

 NA MARYAM NASSOR

SERIKALI ya Mapinduzi ya Zanzibar imesema ipo tayari kushirikiana na wanahabari wa Oman katika kuandaa maudhui  yanayolenga   kuimarisha  diplomasia  ya Habari  ya habari, utamaduni na utalii,  kati ya Zanzibar na Oman.

 Ameyasema hayo, Waziri wa Habari, Sanaa, Utamaduni na Michezo Zanzibar, Dkt. Riziki Pembe Juma,  wakati akihutubia katika kongamano la Jukwaa la waandishi wa Habari wa Oman  na Zanzibar.

Amesema, ushirikiano huo unaweza kuhusisha utayarishaji wa vipindi maalumu vya utamaduni vitakavyorushwa kupitia vyombo vya habari vya Zanzibar na Oman, ikiwemo televisheni na redio.

Amesema maudhui hayo yatasaidia kuonesha historia, utamaduni, urithi na fursa za utalii zilizopo katika pande hizo mbili, huku akiwataka wanahabari kutumia nafasi hiyo kuandika habari zinazojenga uelewa na kuimarisha mahusiano ya watu wa Zanzibar na Oman.

Dkt. Riziki pia amewataka wanahabari kuzingatia maadili ya taaluma, kufanya uchunguzi na kuhakiki taarifa kabla ya kuzisambaza, akisema kasi ya teknolojia na mitandao ya kijamii isitumike kama sababu ya kusambaza taarifa zisizo sahihi.

Kwa upande wake, Balozi Mdogo wa Oman Zanzibar, Said bin Salim Al Sinawi, amesema mkutano huo ni fursa ya kuimarisha ushirikiano wa vyombo vya habari na kujenga uelewa wa pamoja kuhusu historia na maisha ya watu wa Zanzibar na Oman.

Mwenyekiti wa Jumuiya ya Waandishi wa Habari Oman, Dkt. Mohammed bin Mubarak Al Araimi, amesema wanahabari wana nafasi kubwa katika kuhifadhi historia na kujenga daraja kati ya jamii hizo mbili, huku akipendekeza kuwepo kwa mafunzo ya pamoja, kubadilishana uzoefu na kuandaa habari za pamoja.

Naye Mwenyekiti wa Zanzibar Press Club, Abdalla Mfaume, amesema ushirikiano huo unapaswa kuwa wa muda mrefu na kuhusisha mafunzo, tafiti, warsha na miradi ya pamoja ya habari, akisisitiza kuwa vyombo vya habari vinaweza pia kukuza utalii, utamaduni, biashara na uwekezaji kati ya Zanzibar na Oman.

Aidha katika kongamano hilo, waandishi wa habari wa Zanzibar walisaini makubaliano maalum ya mashirikiano kati ya waandishi wa habari wa Zanzibar na wenzao wa kutoka Oman na kuahidi kuendelea kushirikiana.