Mafunzo ya CADiR Yaanza Kuzaa Matunda , Kaskazini 'B' Unguja

Na Salim Ameir

 Mafunzo ya kilimo cha mbogamboga yanayotolewa kupitia Mradi wa CADiR chini ya Mpango wa Uwezeshaji Kiuchumi (EEP), yameanza kuzaa matunda kwa baadhi ya vikundi vya Kijaluba katika Wilaya ya Kaskazini Unguja.

Hayo yamebainika katika ziara ya kutembelea vikundi viwili vya Kijaluba, ambavyo ni Kikundi cha Jitihada cha Kidanzini na Kikundi cha Tuwezeshwe cha Kiombamvua, ambapo wanufaika wameanza kutumia ujuzi walioupata kupitia mafunzo hayo kuanzisha kilimo cha mbogamboga kama shughuli ya kuongeza kipato.

Akizungumza wakati wa ziara ya kuangalia maendeleo ya kikundi chao, Mwenyekiti wa Kikundi cha Jitihada cha Kidanzini, Fatma Mohamed Hamdu, amesema kikundi hicho kinatumia eneo la ekari moja kulima mazao mbalimbali ya mbogamboga.

Amesema mazao yanayolimwa ni pamoja na mchicha, pilipili boga na pilipili za mwendokasi, huku hadi sasa takribani nusu ekari ya eneo hilo ikiwa tayari imelimiwa.

Hata hivyo, amesema changamoto kubwa inayowakabili wanachama wa kikundi hicho ni ukosefu wa mfumo wa uhakika wa umwagiliaji, jambo linaloweza kuathiri uzalishaji na maendeleo ya shughuli zao za kilimo.

Kwa upande wake, Katibu wa Kikundi cha Tuwezeshwe cha Kiombamvua, Raya Massoud Mohamed, amesema kikundi hicho kinatumia eneo la takribani nusu ekari kwa ajili ya kilimo cha mbogamboga na tayari kimeanza kuvuna baadhi ya mazao.

Amesema mazao yaliyokwishaanza kuvunwa ni pamoja na mchicha na bamia, hali ambayo imewapa wanachama hamasa na mwamko wa kuendelea kufanya kazi kwa bidii ili kuinua uchumi wao pamoja na familia zao.

“Kwa sasa tumeanza kuvuna baadhi ya mazao yetu, yakiwemo mchicha na bamia. Hii ni hatua nzuri kwa wanakikundi kwa sababu imeanza kuwajengea mwamko wa kufanya kazi kwa bidii ili kuinua uchumi wao na familia zao,” amesema Raya.

Katika ziara hiyo, timu iliyotembelea kikundi hicho pia ilifanikiwa kununua baadhi ya mbogamboga zilizokuwa tayari zimevunwa.

Hatua hiyo inaonesha kuwa wanufaika wa mafunzo hayo wameanza kuvuka kutoka hatua ya kupata maarifa pekee na kuingia katika uzalishaji halisi unaoweza kuwaongezea kipato na kuimarisha maisha yao.

Pamoja na mafanikio hayo, changamoto ya upatikanaji wa maji kwa ajili ya umwagiliaji bado inaendelea kuwa kikwazo kikubwa kwa vikundi hivyo.

Mmoja wa wanachama wa kikundi hicho, Amina Juma, amesema wanachama hulazimika kutumia madumu kusafirisha maji hadi mashambani, hali inayosababisha kazi kubwa na kutumia muda mwingi.

Amesema changamoto hiyo ni kubwa zaidi kwa baadhi ya wanachama wenye ulemavu, ambao hupata ugumu wa kusafirisha maji kwa mikono kwenda katika maeneo ya kilimo.

Kutokana na hali hiyo, vikundi hivyo vimeomba kusaidiwa kupata mabomba ya kusafirisha maji, vifaa rahisi vya umwagiliaji pamoja na jenereta ndogo za kusukuma maji.

“Mahitaji haya yakipatiwa ufumbuzi, yanaweza kusaidia kupunguza kazi kubwa inayofanywa na wanachama katika kusafirisha maji kwa mikono na kuwezesha kilimo kufanyika kwa ufanisi zaidi,” amesema Amina.

Akizungumzia maendeleo ya vikundi hivyo, Afisa Miradi kutoka TAMWA ZNZ, Zaina Mzee, amesema hatua zilizofikiwa zinaonesha kuwa mafunzo yanayotolewa kupitia Mradi wa CADiR-EEP yameanza kugeuka kuwa shughuli halisi za kiuchumi kwa wanufaika.

Amesema kupitia mafunzo hayo, wanufaika wameanza kutumia maarifa na ujuzi walioupata kuanzisha shughuli za kilimo zinazoweza kuwapatia kipato na kuchangia katika kuimarisha uchumi wa familia zao.

 Zaina amesema , kuwepo kwa miundombinu bora ya umwagiliaji kunaweza kusaidia vikundi hivyo kuongeza uzalishaji wa mbogamboga, kupanua maeneo yao ya kilimo na hatimaye kuongeza kipato cha wanachama.

Amesema kuwa, Mafanikio yanayoanza kujitokeza katika vikundi vya Jitihada cha Kidanzini na Tuwezeshwe cha Kiombamvua yanaonesha umuhimu wa kuunganisha mafunzo ya ujuzi na uwezeshaji wa vitendo.

 Aidha  amesema kuwa ,changamoto ya maji na ukosefu wa vifaa vya umwagiliaji vinaendelea kuhitaji ufumbuzi ili kuhakikisha juhudi na maarifa yaliyopatikana kupitia mafunzo hayo yanageuzwa kuwa uzalishaji mkubwa na endelevu.

Kwa sasa, hatua ya vikundi hivyo kuanza kulima na kuvuna mazao ni ishara ya matumaini kwamba mafunzo ya CADiR-EEP yanaendelea kuwa na mchango katika kuwajengea wanufaika uwezo wa kutumia fursa zilizopo kuimarisha uchumi wao.