WANAWAKE WAMETAKIWA KUTUMIA MAFUNZO KUIMARISHA USHIRIKI WAO KATIKA UONGOZI

Na Maryam Nassor

VIONGOZI wanawake wametakiwa kutumia ipasavyo maarifa na ujuzi wanaoupata kupitia mafunzo ya mradi wa W-LEAD ili kutimiza ndoto zao za kiuongozi na kuongeza ushiriki wao katika nafasi mbali mbali za uongozi.

Wito huo umetolewa na Afisa Tathmini na Ufuatiliaji  Mohamed Khatib Mohamed kutoka  Chama cha Waandishi wa Habari Wanawake Tanzania Zanzibar (TAMWA-ZNZ)   akimuakilisha   Mkurugenzi wa chama hicho Nairat Abdulah , wakati wa ufunguzi wa mafunzo ya siku nne kwa viongozi wanawake vijana kutoka vyama vya siasa, asasi za kiraia na vyuo vikuu Zanzibar  yaliyofanyika katika Afisi za TAMWA Tunguu Unguja.

Amesema,  lengo la mafunzo hayo ni kuwawezesha wanawake kuelewa masuala ya uongozi,  kujiamini na kupata ujuzi utakaowawezesha kushiriki kikamilifu katika nafasi mbalimbali za uongozi.

Amesema kupitia mradi huo  katika  awamu ya pili , TAMWA-ZNZ inalenga kuwajengea uwezo wanawake wengi ili waweze kuingia katika nafasi za uongozi, huku ikipanga kuwafikia vijana 50, wakiwemo 30 kutoka Unguja na 20 kutoka Pemba.

Ameeleza kuwa TAMWA-ZNZ inatekeleza mradi huo kwa kushirikiana na wadau mbalimbali, wakiwemo Jumuiya ya Watu Wasioona Zanzibar (ZANAB), Chuo Kikuu cha Taifa cha Zanzibar (SUZA) na Chuo Kikuu cha Zanzibar (ZU), kwa lengo la kuhakikisha washiriki wanapata maarifa na ujuzi unaohitajika katika kuimarisha uwezo wao wa kiuongozi.

“Lengo kubwa ni kuona mnapomaliza mafunzo haya mnaenda kutekeleza yale mliyofundishwa na kuelekezwa, ili siku moja tusikie kuwa miongoni mwenu wametoka viongozi mbalimbali wanaoweza kugombea nafasi tofauti za uongozi,” amesema Mohamed.

Amesema kuwa,  mafunzo hayo ni awamu ya pili ya mradi huo, ambapo baada ya kukamilika kwa mafunzo, washiriki wanatarajiwa kwenda kuyafanyia kazi maarifa waliyopata.

Ameongeza kuwa,  miongoni mwa washiriki hao watachaguliwa vijana 20 waliofanya vizuri ambao watapata fursa ya kwenda kujifunza kwa vitendo katika taasisi mbalimbali, hatua inayolenga kuwapa uzoefu zaidi katika masuala ya uongozi.

Aidha, amewataka viongozi hao vijana kujiamini, kutumia fursa wanazopata na kuwa na dhamira ya kushiriki katika nafasi mbalimbali za uongozi ili kutimiza ndoto zao.

Kwa upande wake, Meneja  Uhusiano wa TAMWA-ZNZ, Sophia Ngalapi, amewataka viongozi wanawake kutumia mafunzo hayo kuongeza maarifa, kujiamini na kujiandaa kushiriki kikamilifu katika kugombea nafasi za  uongozi.

Akizungumzia manufaa ya mafunzo hayo, Nafda Ali Hassan, mshiriki kutoka Chama cha Mapinduzi (CCM), amesema mafunzo hayo yatamsaidia kuongeza kujiamini na kuimarisha uwezo wake wa kiuongozi.

Amesema atatumia maarifa atakayoyapata kuwafikia wanawake wengine na kuwajengea uwezo wa kiuongozi ili nao waweze kutimiza ndoto zao.

Naye Khadija Anuwar Mohamed, kutoka Chama cha ACT Wazalendo, ameishukuru TAMWA-ZNZ kwa kutoa mafunzo hayo, akisema yamempa ujasiri na imani kuwa anaweza kushika nafasi za uongozi.

Amesema uwepo wa wanawake wengi katika nafasi za uongozi umekuwa chachu kwa wanawake wengine kujiamini na kuona kuwa wanaweza kushiriki katika michakato ya kugombea nafasi mbalimbali za uongozi.

Kwa upande wake, Lulu Alawi Abdallah, kutoka Jumuiya ya Viziwi Zanzibar (JUVIZA), amesema mafunzo hayo yatamsaidia katika safari yake ya kutimiza ndoto yake ya kuwa kiongozi.

Amesema mafunzo hayo ni fursa muhimu ya kuongeza uelewa na uwezo wa wanawake wenye ulemavu kushiriki katika uongozi na kutoa mchango wao katika maendeleo ya jamii.

Mafunzo hayo ya siku nne yameandaliwa na TAMWA-ZNZ kwa kuwashirikisha viongozi wanawake kutoka taasisi mbalimbali, zikiwemo JUWAUZA, ZANAB, JUVIZA, vyuo vikuu Zanzibar na vyama vya siasa, kwa lengo la kuwajengea uwezo, kuimarisha kujiamini na kuongeza ushiriki wao katika nafasi za uongozi.